marquis

Marquis, m. acut. Estoit anciennement nom de commission et de charge, qui n'estoit à la vie du Marquis, ains tant qu'il plaisoit au Prince qui le commettoit à la garde et tuition de sa frontiere. Et ceux qui rendoyent ce mot en Latin, l'appeloyent aussi tost Comes que Marchio. Or a il prins sa source des Capitaines establis sur les garnisons des frontieres, comme dit Boniface Amerbachius, qui estoient appelées Limitanea praesidia, et les gents de guerre y establis, Limitanei milites. Car Marcken en Allemand signifie frontiere. Et Marck-grave, celuy qui est sur-intendant sur la frontiere, Comes tuendis limitibus praepositus. Mais depuis le Marquis a prins rang de dignité feodale apres les Princes et les Ducs, precedant les Comtes. Et telle que le Marquisat est dit fief Royal, ainsi que la Duché et Comté. Et le Marquis, Capitaine du Royaume, ou du Roy, tout ainsi que les deux autres. Antoine de la Sale au livre qu'il a dedié au Duc de Calabre et Lorraine, escrit qu'un Comte ou puissant Baron, pour estre fait Marquis, doibt avoir du moins cinq ou six Baronnies (quoy qu'Alciat n'acquiesce à cette opinion) en la moindre desquelles il ait dix nobles hommes ses subjects. Lors ayant supplié l'Empereur ou son Roy, ledit Seigneur, ou son deputé, qui sera Prince ou Duc, et de plus grande dignité que Marquis, estant en la maistresse Eglise, apres la grande Messe celebrée par un Prelat de marque, au futur Marquis, qui sera à genoux devant luy, et luy offrira nouvel hommage de toutes ses Baronnies reduictes au seul nom de Marquisat du tiltre de la plus noble desdictes Baronnies, fera reciter à haulte voix les lettres de l'erection dudit Marquisat, et recevra l'hommage et foy d'iceluy, et luy en fera l'investiture par un tres-riche ruby, qui porte signe de Seigneurie, le luy mettant au moyen doigt, ce voyant et oyant toute l'assemblée des Princes et grands Seigneurs, Dames et Damoiselles, qui doibt estre faite grande, et tout ce jour là honoré de festins et tournois les plus beaux que faire se pourra. Par cela on void que la consideration de la garde et tuition des frontieres de l'Empire ou du Royaume n'a plus de lieu en la creation d'un Marquis, ainsi que le nom de cette dignité le requiert. Car je ne trouve nullement bon le reject qu'Alciat fait de cette deduction du nom de Marquis, au 1. livre de ses Parergues, chap. 27. ne l'opinion qu'il a celle part, que Marquis vient de Marca, signifiant cheval, toutes deux dictions Celtiques, ou comme il dit tant au livre de singulari certamine, chap. 32. que sur la loy Censire. ff. de verb. et rer. signific. Germaniques. Et partant que Marquis est proprement ce qu'on dit en Latin Magister stabuli seu Equitum. Mais que finablement il a sorty tiltre de propre et peculiere jurisdiction, tout ainsi que les noms de Duc et Comte. Il allegue que le mot Marcomann, composé dudit Marca, et Marcoboduus signifient l'un, peuple excellent en fait de chevalerie, et l'autre un Roy qui avoit le corsage comme d'un cheval: Et que les Celtes Gaulois qui estoient en l'armée de Brennon, appeloient en leur langue, comme recite Pausanias, Trimarcisiam, les trois rengs de gens de cheval. Mais rien de tout cela ne presse, ores que Rhenanus, Althamerus, et Glareanus se soient meslez de cet advis. Car quant à ce que tous disent que les François disent encores de present Marcare pour aller à cheval, et que du regne des Lombards ou Langbards en Italie, et des François yssus des Germains apres eux, Magistri stabuli seu Equitum, estoient appelez Marquis, J'en vouldrois avoir authorité en faveur de cela.

Thresor de la langue françoyse. Jean Nicot.